【靚女唔怕臭】王君馨初嘗榴槤乸晒口臉

「竹升妹」王君馨（Grace）憑住《城寨英雄》中嘅「花曼」一角人氣急升，工作接踵而來！最近仲同埋姚子羚及蔡思貝去咗「榴槤王國」馬來西亞做嘢，佢仲獻出第一次，就係食榴槤喇！

Grace喺Instagram上載短片，佢話係初次食榴槤，見佢食到苦口苦臉，話「我都唔知食緊乜嘢」，不過當佢食過「貓山王」之後，就話原來有啲似食奶黃包，味道都ok，挑戰成功呀！而佢身邊嘅蔡思貝就食唔停口，誇口話：「我一出世就食榴槤！」真係「大口氣」呀！而子羚都拍咗片放上微博，一樣食得津津有味！

不過真係要讚吓Grace，因為唔係好多人敢踏出呢一步㗎嘛，唔知佢會唔會因為咁，愛上「榴槤」在摩天輪呢？