代言人酬勞四級跳？周麗淇：每年加少少

藝人周麗淇Niki以代言人身份出席Just Gold鎮金店25週年活動，她透露已是第四年任代言，問到酬勞是否四級跳？她說：「每年根據經濟加少少，合理嘅！」她透露近日忙於在內地拍劇，問她是否全力賺人仔？她續說：「大部分時間啦，但都有返香港嘅。（見家姐周汶錡囝囝？）係呀，佢好得意，依家識行又會叫我姨姨，我日日都同佢視頻。（第二個阿媽？）佢都識得分嘅。」

問到Niki恨唔恨生BB？佢就話：「唔恨，玩吓人哋嘅咪幾好。（有冇拍拖？）冇，我又少咗喺香港，做嘢多咗，冇乜機會諗呢方面，順其自然啦，都唔急嘅，緣份隨緣。（成日喺內地識內地男仔？）如果緣份到內地、香港、法國都冇所謂，不過我好宅女，成日喺屋企，或者酒店。（留機會畀香港男仔？）我本來真係做港男評判㗎，但因為做嘢所以做唔到，呢啲冇緣囉！不過我見咁多女神級都遲咗結婚，我唔係話自己係女神，意思前面咁多成功例子都係做好事業先，依家女人工作好梗要，唔係第日出聲都細聲啲。（唔擔心高齡產婦？）我冇諗生BB同結婚嘅嘢！」