吳啟華一打十嗌好甘：唔好當我係甄子丹

藝人吳啟華、宣萱、陶大宇及呂晶晶等到尖沙咀出席劇集《隱世者們》記者會，宣布劇集將於9月22日在myTV SUPER播出，飾演特工的主角啟華在劇中動作連場，演慣斯文角色的他笑說：「今次打得好甘，我同監製鄧特希講，你唔好當我係甄子丹喎！一個打十個！同埋一拳要打好多次，配合唔同角度，計埋NG，你睇就一秒，但其實打咗好耐。（頂得順？）勉強啦！係嗰晚詐咗一次型，近排慣咗早睡早起，拍通宵戲係辛苦咗，仲要打足全晚。（受傷？）好彩冇，我都幾錫身，做足熱身，平時都會做運動。（同老友再合作心情點？）大宇係幾十年『老同學』啦！但冇咩點合作，唯一一次係《壹號皇庭》，但同場戲好少，今次係多咗機會一齊，開心呀！可以想吓當年！宣萱、蘇永康就一直有合作吓啦！大家做嘢唔使講咁多，好有默契，平時又可以玩吓。」

他透露劇中張文慈飾演其前妻，但很少同場，其後則與演複製人的趙碩之有感情戲，問到對她評價如何？他說：「佢絕對OK呀！佢角色好難演，仲要唔止一個角色。」啟華又笑言因蘇永康角色懂易容，令他要演埋對方的戲份：「我要收埋佢份片酬呀！起碼要請食飯呀！」