宣萱主動向陶大宇送吻：唔止蜻蜓點水！

藝人陶大宇、吳啟華及宣萱等到尖沙咀出席劇集《隱世者們》記者會。劇中宣萱要主動向大宇獻吻，她笑言從影以來甚少做主動，因此拍攝時也頗尷尬：「可以再做好啲，因為我好少演主動，但係同大宇係好拍檔，係放心啲。（有幾激？）唔止蜻蜓點水架，不過比我想像中冇咁犀利。」大宇笑言已不止一次跟宣萱拍咀戲：「原來拍感情戲唔郁係咁舒服，下次都同編劇講，等對方嚟好過，可能導演仲新，唔好意思叫我哋嚟多個，好多時都一Take過。（你想咀多幾次？）我梗係唔介意啦！唔使郁又咁舒服，任佢搞，佢都發揮得好淋漓盡致架！」

宣萱自認傳統

問到宣萱平日跟男友是否也做主動？她即嚇一嚇：「嘩！呢啲私人嘢！唔好拎出嚟講啦！」大宇即為她打圓場：「咁情況都唔同嘅，要睇日子、Timing。」宣萱又自認傳統，通常交由男仔主動追求，問大宇是否喜歡主動的女士？他笑說：「都係睇心情！我覺得話就話要咩要求，但好多時情到濃時就咩都得架啦！最緊要開心，任何人一齊，男同男、女同女都一樣。（你幾時再宣布喜訊？）有嗰陣會話你聽！（依家有拍拖？）有異性朋友相處。（同居？）我同宣萱都相處緊架！都唔一定同居，同埋我都幾十歲人，有咩所謂丫，最緊要開心，我都要交朋友嘅，唔係一支公好慘嘅，依家工作上感情上都係求開心，同埋有得選擇，要逼就唔係依家想要嘅嘢。」講到今次劇集畫質達4K超高清，宣萱笑言皺紋都睇到，要花錢執執個樣，非常搞笑！