休息時間扮醜女　Twins慘遭「拖鞋打面」

歌手鍾欣潼（阿嬌）同蔡卓妍（阿Sa）最近去咗佛山舉行《Twins LoL 世界巡迴演唱會》，唔知係咪休息時太悶，阿嬌不停玩變臉App打發時間，呢兩日瘋狂喺Instagram洗板！扮熊、扮豬可愛嘅效果當然唔少得，作為宅男女神嘅佢唔介意以醜女示人，大玩絲襪笠頭效果，仲好入戲咁扮到好辛苦，又留言話：「對絲襪好緊呀……」亦有上載同好姊妹阿Sa被飛拖鞋嘅短片，兩女影后上身做出痛苦表情，認真搞笑！