王菀之開完騷先落力造人：依家要小心啲

歌手王菀之出席保良局屋邨籌款活動，透露小時候由外婆湊大，一起住在屋邨，問她若有小朋友是否也會請媽媽幫忙湊？她說：「未知，不過到時好似自己湊好啲，如果生的話。（自己湊唔做嘢？）其實我想像唔到點樣兼顧湊BB同工作，做媽媽真係好偉大，我媽咪成日話為咗我同阿哥犧牲咗好多，我身邊好多同齡同學都結晒婚生晒bb。（咁你同老公有冇計劃？）唔係好實在嘅計劃，冇講定要幾多歲前要有，（謝安琪都造人成功？）替佢好開心，依家一仔一女，我自己都有哥哥，兄妹係好幸福！（同佢取經？）學少少，度度吸收啲。（你有冇湊過bb？）我哥哥都有兩個小朋友，由手抱到幾歲都搞得掂。」問到是否隨時ready當媽媽？她指最快也要在跟張敬軒的演唱會後才順其自然造人，她笑說：「依家要小心啲，如果唔係張敬軒唔肯過我。」談到昨日她與父母一起欣賞葉德嫻演唱會，何以老公沒同行？她續說：「睇呢啲演唱會就會諗起爸爸媽咪。（老公冇詐型咩？唔預佢？）我都唔係去玩，佢夠膽唔畀咩？佢有時都會陪我爸媽，我又會陪佢爸媽，好融洽嘅！」