英皇全體藝人賀榮休　吳雨：多謝楊受成

英皇娛樂行政總裁吳雨出席張敬軒和王菀之（Ivana）的演唱會記者會，吳雨表示去年見兩人做完《拉闊音樂會》即向同事表示要為兩人開演唱會，就如當年容祖兒和李克勤一樣，當兩人一齊開完音樂會後即計劃為兩人開演唱會，但仍要相隔多年後才成事，但今次軒仔和Ivana兩間公司一傾即合，可謂天衣無縫。

「一個終結，夠皮啦」

問是否榮休前的「大製作」？吳雨笑言：「唔關事，嗰時做都未決定嘅（榮休）。」問何時榮休？吳雨表示：「呢個都要交代，都講咗，其實都多謝老闆（楊受成），我本來都話食餐飯就得，但老闆話唔得，話一定要叫晒所有藝人，最後就決定10月30日，就晒所有藝人出晒嚟。（場地邊到舉行？）到時再公開啦！」

問可會捨得離開多年工作的地方？吳雨謂：「都冇話捨唔捨得，但都16年喇，睇住英皇成長，睇住好多藝人成長，各有各精彩，我都好開心，都係好多年心願，連克勤都加盟咗喇，係開心，一個終結，夠皮啦！」

「我最怕係環遊世界」

榮休消息公開後，可有其他公司向他打主意？吳雨笑言：「係你話啫，咁退休就退休啦。（去環遊世界？）我最怕係環遊世界，咁我之後都好多嘢要處理，因為我個仔去咗加拿大升學，我都係啱啱返嚟，其實成件事都係三、四月先決定嘅，個仔16歲啦，都畀佢去獨立吓啦，所以加埋自己嘅事，都係一個好重大嘅決定嚟。」