吔飛機包離奇中招 陳浩民:脷同口腔灼痛

20160928
東網電視
更多新聞短片
食個包都可以出事,真係好驚嚇!
藝人陳浩民與老婆蔣麗莎(Lisa)昨晚乘搭飛機由北京回港期間,畀飛機餐嘅麵包灼傷,飛機一抵港,兩人即被送院。《東網》記者就此事致電陳浩民,卻爆出「灼傷」有內情,他表示:「我似係畀一啲腐蝕性好重嘅嘢,辣傷我個嘴。如果因為係個包太熱而辣親,只係會怪我自己,但唔係咁!我都唔知係啲乜嘢嚟(指引致灼傷的源頭),咬咗幾啖吞埋之後,條脷同個口腔就開始出現灼痛,開頭仲諗係咪啲芥辣,但之後愈嚟愈唔妥,成個口腔好似畀一啲強酸性嘅嘢灼傷咁,依家個包都攞咗去化驗。」問到會否追究?陳浩民則表示:「言之尚早。」
而陳浩民太太蔣麗莎同樣是口腔被灼傷,問到可會追究有關航空公司?蔣麗莎則表示:「每個人都應該把焦點關注在食品健康、安全上,不要把焦點放在我們身上,今天這個事情不管發生在哪個人身上,都應該被重視。我們希望通過自己微薄之力呼籲大家一起監管食品安全,這是我們日常生活中最基本的保障!」
港龍航空晚上發聲明認衰,承認有乘客食用晚膳的餐包後口腔受損,當值機艙服務員已提供協助。並向乘客衷心致歉,顧客服務部已與乘客聯絡以提供進一步協助。港龍航空亦會就事件與有關供應商跟進。