Dry得滯？周秀娜公然搵「老襯」！

藝人周秀娜（Chrissie）出席萬聖節活動，以黑色造型亮相的她，表示專誠揀選較沉的顏色配合主題，又透露很喜歡小丑，故今年萬聖節想扮電影《自殺特攻：超能暴隊》中的小丑女：「我最鍾意萬聖節，每年都會精心部署造型，我記得有年萬聖節着住全身白色衫，又搽咗個紅嘴去搭山頂纜車，成班人上車，本身有一家人想入嚟坐，見到我哋都唔敢入，唔知係咪我哋扮得太神似，畀我哋嚇親。（會唔會去蘭桂芳狂歡？）我上年都有去，扮鬼扮馬去唔同地方玩。」她又笑謂想今年再搵兩個「老襯」陪扮小丑。

提到扮小丑女的服飾很貼身及性感，問會否加操身形？她說：「我對自己嘅身形絕對有信心，同埋魚網絲襪都夠頂一頂，仲有支棒球棍，遇到咩事都用得着。」