自認大細路　曾志偉自爆鍾意儲女人？

藝人曾志偉到元朗出席活動，他稱自己是「大細路」，他說：「呢間舖頭係賣新玩意，我都有追好多新科技產品，不過我玩完就掉，古天樂就係玩具迷，鍾意儲嘢，我玩厭就唔要。（你鍾意儲咩？）女人囉！哈哈哈，唔係，我鍾意儲錢，講真，我儲咗好多帶（錄影帶），係啲舊節目、舊戲，外國嘅、自己嘅都有。」

新搞作賀無綫50周年

志偉又謂有新大計，他說：「出年係TVB嘅50周年，我計劃緊製作啲節目，可能再做《歡樂今宵》，或者每個禮拜做一個以前嘅節目。（搵埋林敏驄做拍檔？）佢out晒喎！或者都可以做番《開心主流派》，ATV（亞視）小氣，以前唔可以做，依家冇咗，可以做啦！」

搞錯李漫芬係袁潔瑩

對於活動主持李漫芬（Fanny）早前宣布即將嫁人，志偉說：「我仲以為邊個Fanny，以為你問袁潔瑩，袁潔瑩嫁得出就真係高興啦！頭先見到李漫芬個男朋友，幾好呀，結結實實，有心有力，個樣都老老實實！圈中人可以同圈外人結婚，都係好事嚟嘅！」