扮金魚觸怒男途人　G.E.M.被鬧好低B！

歌手鄧紫棋（G.E.M.）今日推出《25LOOKS》個人寫真集，寫真集中G.E.M.換上25款全新創意造型，並在香港金魚街、彩虹邨等實地取景，大玩本土情懷。為了配合主題，她上山下海走勻香港宣傳，分別走訪書報攤、渡海小輪及摩天輪，親自收集市民對她本人及寫真集的不同意見。她分別去了尖沙咀書報攤、乘搭渡海小輪及到達中環做摩天輪。

被寸成日扮金魚

首先，女主持人在尖沙咀進行街頭訪問，身穿比卡超公仔服的G.E.M.則事先躲在報攤後方，透過耳機直擊街訪情況，待受訪者完成問卷後才驚喜現身。而問卷內容大多圍繞住過往外間對G.E.M.的評價，例如被冠以「國際漿」、「宇宙G.E.M.」等外號及經常被人評論時裝品味等問題。受訪的市民對G.E.M.有讚亦有彈，當被讚可愛靚女時，G.E.M.笑到見牙不見眼，不過當遇上批評時，仍大方欣然接受。其中一名男途人被問到「如果G.E.M.出現在你面前，你會想同佢講乜？」，他竟爆肚說：「我會見鑊打鑊，成日扮金魚，好低B！」

坐完渡海小輪到達摩天輪時，G.E.M.邀請香港市民一同乘坐摩天輪，並在包廂裏與市民玩「真心話大冒險」。其中邀請到一對在附近拍攝的婚照的準新人接受挑戰，一輪遊戲後，落敗的準新娘抽中「誠實卡」，G.E.M.要求準新娘在鏡頭前向前度情人講出一番心底話，G.E.M.笑言在「攞景贈興」，又擔心一對準新人會面臨「家變」。其後，G.E.M.也毫不介意接受大懲罰，包括被人畫大花面，及即場任人點歌，在摩天輪內以「唱K神器」晒靚聲，最後在一片歡笑聲中完成挑戰。

「真係驚畀人打」

經過一整天的宣傳活動後，G.E.M.坦言最喜歡摩天輪環節：「因為其他人好多時都喺從網上，或者唔同嘅媒體上見到我嘅造型、聽到我嘅歌，但我好想真係同佢哋近距離接觸，同人面對面接觸、傾偈，令我感覺到好大嘅親切感。」

提到在進行街坊時，遇到不少負面聲音，G.E.M.笑說：「今日我聽到一個最正嘅答案係，有個人話見到我真人想打我，我走出去嗰時真係驚驚哋佢會打我。但原來好多人見到我真人之後，都會突然間對我有少少改觀，呢樣嘢係值得開心嘅。」