【死唔肯講有冇拍拖】阿佘呻唔識照顧人

藝人佘詩曼到電視城錄影節目《我愛香港》，她說：「今晚同我啲好姊妹代表港島東，其實我哋班姊妹每兩個禮拜都會聚一聚，佢哋分配時間好叻，有啲仲有兩個細路，我就連照顧自己都唔叻，都唔好講照顧人。（羨慕人哋成家立室？）我依家都幾開心呀！感情事隨緣。（返內地工作有冇小鮮肉約你？）我又冇諗過呢樣嘢喎，不過有冇約都唔會話你知。（會好似舒淇咁結婚至講？）唔知呢，surprise！不過我都戥佢哋開心。」

提到好姊妹文頌嫻早前被傳丈夫財困，需要阿佘出手解困，並為她鋪路復出，對此阿佘說：「梗係唔係啦！今晚係獎門人（曾志偉）邀請我哋，唔係我出面做聯絡，我邊有咁大面子！（文頌嫻老公有財務難題？）根本冇問題，文頌嫻淨係需要我哋安慰，因為佢好耐冇接觸花邊新聞，仲影響到個女，佢有唔開心。」