王菀之愛嗲媽咪　軒仔眼冤：起晒雞皮

即將合作開騷的張敬軒與王菀之（Ivana），日前雙雙作客TVB娛樂新聞台節目《StarTalk》，二人你一言我一語大談開騷感受，十足一對鬥氣冤家！

Ivana大爆軒仔有意在演唱會騷跳技，她說：「佢提出今次想跳踢踏舞（Tap Dance），不過佢以為可以咪嘴咁夾跳，但對唔住我跳Tap係要Solo，而且我唔夾！」軒仔則説：「大家等睇Ivana找數，你唔Solo五分鐘你唔好落台。」軒仔更取笑Ivana的舞姿，他說：「見字如見人，佢寫啲字圓碌碌肥嘟嘟咁，佢舞姿（冇脂）？佢有大把脂啦，脂肪個脂！」

軒仔亦不忘向Ivana反擊，爆料指Ivana媽媽的舉止同樣令人摸不着頭腦，軒仔說：「你以為Ivana絕頂，佢媽咪更絕頂，有次喺新加坡Ivana無啦啦高八度咁嗲佢媽咪，話想食蟹鉗，佢媽咪話：『好好好！等媽咪整畀妹妹食！』仲要點埋汁畀個女！都幾廿歲喇！搞到我雞皮都起晒！」Ivana聞言即說：「你講到我好似廢咁，我有做嘢，你唔好搬晒你啲葡萄出嚟啦。（老公Eric會呷你同軒仔醋？)我會講我哋發生嘅事畀Eric知，佢又好鍾意聽，我諗軒仔係唯一一個異性朋友允許有呢種關係。」