【二女出世！】王力宏晒閃爆一家三口合照

40歲嘅台灣天王王力宏（Leehom）與30歲嘅老婆李靚蕾喺2013年結婚後，翌年七月誕下大女王嘉莉。今年二月，王力宏宣布老婆再度有喜，日前更特登停工兩個月陪老婆。王力宏早幾日前曾喺社交網站放風話老婆隨時生得，更有傳佢喺今個月3號已經帶埋兩歲大女過美國陪老婆待產。今日下晝，王力宏親自透過微博宣布第二胎BB出咗世喇！佢晒出一家三口嘅溫馨合照，仲留言透露已經幫囡囡改好中文名：「王嘉娜寶貝，歡迎來到我們可愛的世界。我們再度感受到了生命的奇蹟（迹）！母女均安！謝謝所有朋友，媒體朋友和歌迷朋友們的祝福！」

雖然相中唔見B女嘅容貌，但係就見到王力宏伸出右手食指畀囡囡捉實，仲一面慈父樣，而老婆李靚蕾就瞓喺床上微笑住瞇埋雙眼，畫面真係好溫馨！