【重口味】方中信搵郭少芸水着相解悶？

藝人方中信出席無綫劇集《律政強人》「謝師宴」聚會，獲劇中徒弟們逐一斟茶，又送上蜜糖，氹得他高興非常。

同曹永廉瘋狂互寸

首次現身該劇宣傳的他，笑指見無綫道具組遺失了其人形紙牌，故惟有以真人現身，在旁的曹永廉即抵死地謂：「化（火化）咗啦！」後來方中信欲拍下網友的評價紙板時，阿廉又謂：「燒埋畀你喇！」雖然句句大吉利是，不過方中信未有嬲怒，更以「今年甘草演員你攞硬」來反擊對方，場面惹笑。

自認貪錢返無綫拍劇

近年長駐內地拍劇的方中信，在內地每日開工12小時，但於無綫開工卻慘被當成茶樓夥計，日踩15至16小時，中段僅得兩小時落場。對此他自言貪錢，再加上與監製關係好，所以才答應演出。對於劇集反應好，並獲無綫高層高度讚揚，方中信直言感開心，認為辛苦三個月很值得。

拍續集要求工時短啲

對於監製羅永賢有意開拍第二集，方中信表示要睇監製及高層決定，但先要給他回氣，更謂：「雖然套劇收視點唔係好高，但內地開工都好多人同我講套劇好睇。（下次開咩條件？）錢，工時比內地多一個鐘...畀13個鐘佢（TVB），平時TVB開14至15個鐘。（對白想唔想少啲？）講母語會舒服啲，上面開工講普通話要時間tune，令個腦會delay少少。（對手有冇要求？）點要求得咁多，我又未拎過視帝。（拍劇交換條件？）我唔慣做呢啲嘢。」

寸曹永廉一把年紀

談到他於台上表示看過黃智雯三點式，方中信笑指未埋位時也會在網上搜尋該些照片來開玩笑，他謂：「智雯都叫近年啲（參選香港小姐），郭少芸都搵到先驚，上咗年紀，都幾難搵，嗰時佢亭亭玉立，佢好在玩得。（阿廉話燒嘢畀你唔嬲？）等佢開心吓，佢都一把年紀！」