堪輿學家麥玲玲、日本占星術師薰子及王友良出席活動。麥玲玲表示將會聯同薰子合作打入日本市場，她說：「其實年幾前王友良叫我去日本試吓，仲拎咗我本玄學書去日本，搵咗薰子老師同我合作，王友良幫我完成呢件事，好似我日本代理人咁。咁我同薰子傾過幾次電話，之後就約出嚟見，咁就合作啦！（大家有冇互相算吓旺唔旺對方？）有呀！大家都好夾呀！」

日本推出玄學App

麥玲玲又謂屆時會與薰子在專欄中分析藝人運程，並希望與網站合作搞直播，帶薰子打入內地市場。麥玲玲表示將會在日本推出玄學App：「係畀少女睇去戀愛運，仲畀日本人封咗叫香港女仙。」

問到麥玲玲賺完人民幣又賺日圓，收入豐富，她說：「咩呀！試吓唔同地方嘛！（你近來買樓！）幫個女仔（員工）畀首期，依家同佢業權一人一半，佢15號搬入去啦！（你仲請唔請人？）依家好難請人，要對員工好啲！」

薰子叫麥明詩見多啲人

兩位大師在活動上又即場為香港幾位女藝人分析運程，講到新鮮出爐港姐冠軍馮盈盈，薰子表示：「如果呢個男朋友四年前識就可以繼續落去，佢真命天子要12年後先出現。」而麥玲玲則表示馮盈盈與麥明詩相似，被捧紅後機會多，要與男友少見面才能維繫得好。

而麥明詩亦是其中一個被分析的藝人，問到麥玲玲會否知道她與林作的戀情一事：「可能連佢自己都唔知。佢今年係離離合合，會易入三角關係之中，出年會清楚少少。」至於薰子則表示：「佢年半前遇到人生中最適合嘅男人，不過呢個男人對任何人都有興趣，佢應該見多啲唔同嘅男人。」