黃浩然做中間人！洪永城馬國明世紀合照

藝人洪永城同馬國明嘅「碰杯事件」一直係謎，皆因佢兩個不時互寸，雖然佢哋話平時喺化妝間都有偈傾，馬國明又堅稱自己當時冇醉，不過佢都依然經常「被捲入」唐詩詠與洪永城嘅戀情。

好喇，不和之說傳咗咁耐，終於都有人甫咗佢兩個新解滾熱辣嘅世紀合照！事源拍緊新劇《我瞞結婚了》嘅黃浩然，同有份齊齊拍攝嘅洪永城日見夜見，有合照自然唔出奇，不過佢哋唔知係咪喺化妝間撞到馬國明，跟住就柴娃娃一齊合照，雖然黃浩然做咗「中間人」隔開兩個人，不過呢張依然係「碰杯事件」後嘅「世紀合照」，兩個男主角用行動去證明冇不和，兼且私底下喺化妝間的確係會有交流㖭！

之後黃浩然就甫咗張相上社交網，不過佢就賣晒關子咁寫：「世紀合照！佢哋兩個真係不和？我哋三個係咪好friend？」佢仲玩嘢地hashtag咗一句「洪生個樣好似有啲唔自然喎」，一班網友見到都齊齊起哄，話黃浩然做咗二人中間嘅「小三」，又有網友提議洪永城同馬國明合作拍劇，到時一定好好睇喎。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon