被秋官眼神感動　張敬軒任欣宜騷嘉賓

歌手鄭欣宜在九展舉行尾場演唱會，唱完《有故事的人》後，台下有人讚欣宜：「好性感呀！」欣宜即笑言：「王君馨特別大聲過人，不過我鍾意。」之後她換上泰山裝跳唱幾首快歌，全場high爆，但期間她不慎露出黑bra。接着她換上露肩花花裙唱《給最開心的人》，唱完後她有點哽咽。然後她換上類似婚紗的bling bling晚裝，唱出《女神》前，她多謝填詞的黃偉文，之後哽咽多謝大家：「係你哋將我喺深底拉番出嚟。」唱出《女神》時，欣宜更直情爆喊。

Encore環節時嘉賓張敬軒以全紅造型現身唱出《青春常駐》，全場歡呼。之後換上T恤的欣宜出場，並邊扮跪軒仔，邊叫對方「皇上」，笑言：「你應該叫我平身。」軒仔即笑言：「平咩身，你咁玲瓏浮凸，歡迎大家嚟到全香港喊得最多嘅演唱會。」欣宜又謂多謝軒仔今日來做嘉賓：「佢本身係做尋晚個場嘉賓，但佢一知道打風就話可以調，但原來佢今日係有約，所以真係好多謝佢。」

之後軒仔就謂：「個幾星期前，嗰日做《星光熠熠耀保良》記者會時，喺門口見到你爹哋。」此時鏡頭即影住秋官，秋官企起身飛吻，欣宜即扮接住，軒仔續謂：「其實個日未落實（做嘉賓），但秋官見到我就話多謝做我個女嘅嘉賓，我見到佢嘅眼神係我由細到大睇佢演嘅劇集、舞台表演從未見過，係慈父多謝身邊人支持自己女嘅感激眼神。」此時欣宜又忍不住喊。軒仔又安慰欣宜：「可能今晚調左時間有啲朋友嚟唔到，但呢個係好正常，我之前病咗喺澳門開騷當晚都只係得五、六成，但欣宜今晚好生性，施盡渾身energy送畀你哋。」

接着軒仔向欣宜送上閃燈花球：「頭先你套衫差咁樣野，所以送呢個畀你，希望你有咗好事業，跟住落嚟可以搵到處好人家。」之後欣宜又講番一個多謝軒仔的事：「08年我好迷茫時候，我上一個電台live訪問，軒仔喺我隔離，仲一齊合唱《Endless Love》，好開心佢為我加油，所以我開演唱會一定要邀請你，多謝你！」而軒仔臨落台時錫欣宜的面。