《老表3》演員臨時拉夫？祖藍壓力爆煲！

王祖藍與岑麗香（香香）在將軍澳電視城為劇集《老表，畢業喇！》拜神，《老表》系列拍攝到第三輯，祖藍坦言壓力大，他笑說：「壓力好大，上次經過好多風波，今次張繼聰要生仔，王菀之要開演唱會，嗰班有毛有翼，所以臨時搵咗鄭欣宜、林欣彤。今次劇本出得有啲急，對我嚟講好大壓力。（張繼聰客串？）佢會客串做幾集，佢太太大肚要照顧，明白嘅。（王菀之會唔會客串？）睇吓之姐心情啦，哈哈，之姐突然間又話呢排演唱會好忙，突然又問我係咪可以客串，我話你想點呀，都係睇吓之姐心情。本來都有問張敬軒，但佢哋開演唱會，留番《老表4》啦。」

感激欣宜仗義幫忙

問到《老表，畢業喇！》是不是最後一集，祖藍就回應：「《老表，畢業喇！》主要講校園，今次講教育制度。（香港教育制度有冇影響你造人？）大家成日研究喺香港生定外國生，我自己未研究到所以唔生住，今年工作室都會好忙，等上咗軌道先。（自己戲份會多啲嗎？）因為要寫劇本，所以每集會出一兩場。」祖藍又透露鄭欣宜是臨時頂替，並多得對方仗義幫忙，又謂欣宜角色十分感人。

香香做大肚女神

岑麗香劇中則做番自己－「女神」，但為錢做代母，變成大肚女神。祖藍指前兩集香香也是做年輕版的朱咪咪，故今次回饋對方，讓對方飾演女神角色。問到香香現實中可會考慮做代母？她笑說：「現實中要諗諗，劇中講我需要錢，所以接咗呢個Job。」祖藍說：「係呀，TVB幫佢接㗎。」

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon