定欣阿田「神同步」再升級　網民激讚勁

視后胡定欣同田蕊妮（阿田）去年喺無綫劇《鬼同你OT》玩「神同步」，當時佢哋同步開聲，一take過講咗百幾字對白，就連動作、眼神同角度都做到完美一致，同大家展示咩為之真正嘅「神同步」，技驚四座！呢一幕為佢哋贏盡口碑，兼且攞埋視后寶座?！兩大視后最近又合作劇集《來自喵喵星的妳》，觀眾都好期待佢哋再展「神同步」奇技，尋晚播出嗰集終於有得睇啦！

尋晚嗰集講到定欣私人教授阿田點樣着高踭鞋，仲搞笑地創作埋口訣：「第一雙眼望前面，第二重心放後面，第三步伐小一點，第四抬腳唔怕跣。」估唔到阿田一點就明，HIGH爆嘅兩人仲展現「神同步」，着上兩吋高踭鞋喺屋企行CATWALK，仲要同步擺出甫士，兼且要一字不漏背出口訣，一心三用難度極高！勁合拍嘅定欣同阿田，之後再同步開聲鬧陳豪做完美ENDING。唔少網友睇到呢幕都拍爛手掌，仲話今次「神同步」嘅難度升級，但佢哋依然咁合拍，真心要畀個「勁」字佢哋呀！

尋晚嗰集仲有另一個亮點，就係劇中向來MAN爆嘅定欣，竟然形象大反轉，用把姣爆聲線教路點樣做女人，仲要挺胸兼趷籮展示自己嘅S形身材，睇到人眼都凸埋！而阿田一向密實示人，尋晚嗰集竟然着上貼身透視裙，胸前若隱若現之餘，弗爆嘅佢仲前凸後翹，相當性感，令唔少網友眼前一亮！

網民有話兒：

KaXXXong：神同步行完CATWALK，之後仲神同步一齊鬧陳豪，好搞笑！

陳伊X：今次難好多，又要顧住行catwalk，又要講對白，唔知佢哋ng咗幾多次？

XXXGigi：點解佢哋可以咁合拍？

EstheXXXX：不誇張，這幕我看了N次。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon