苗僑偉最愛流動廁所？宣萱：深圳有就好嘞

苗僑偉、陳豪、宣萱、黃翠如等於電視城出席電視劇《使徒行者2》開鏡典禮，該劇早前已到泰國拍攝外景，問到眾星最難忘甚麼？苗僑偉搞笑「愛廁所」，他謂：「我最難忘個流動廁所，除咗乾淨之外，仲有音樂、冷氣同香氣。」在旁宣萱聽到即附和：「如果深圳都有咁嘅流動廁所就好嘞。」

仲未有劇本？

完成台上儀式後，苗僑偉與宣萱一齊接受媒體訪問，繼《賭城風雲》、《刑警》之後再合作的他們，默契十足，訪問時一唱一和，談到戲中角色，宣萱指自己只收到天書（即簡單介紹劇情），劇中她會演退休臥底，拍劇經常演綁架戲的她，被問到今次會否被綁？她笑言：「可能會有㗎！（苗僑偉去救你？）唔知，可能我救番佢呢！不過，我哋係有感情線，同埋角色有啲複雜，我有小小亂。」

大讚泰國攝製隊專業

苗僑偉則表示新劇中，依然與「歡喜哥」許紹雄有好多對手戲，不過是全新故事，談到宣萱指角色有些複雜，他直言：「呢個係《使徒》嘅作風嚟，角色係複雜啲。（你之前喺泰國有冇拍飛車戲？）都在所難免，不過，泰國啲景真係好特別，有啲係香港無。（三嫂有冇過嚟探你？）有。（你拍危險動作有冇嚇親？）冇，太危險嘅會搵特技人做，佢嚟順道度假，今次外景唔算辛苦，一日十二至十四個鐘，有時間休息，同可以拉大隊去食嘢。今次去泰國拍外景，見識到泰國當地拍攝團隊嘅專業，乜嘢都好周到，問番知道佢哋原來同荷里活團隊合作過。」

談到新劇同宣萱有沒有親熱鏡頭？宣萱答：「未知，只有幾集喺手。（會唔會自訂休息時間？）唔會，因為訂咗其他人會好辛苦，包頭包尾，唔想咁。」在旁的苗僑偉則大讚宣萱是鐵人，宣萱則指自己若頂不住都會出聲。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon