【睇到尾先知】明福俠新片呃晒網民

「明福俠」黎明（Leon）返嚟啦！佢又再一次出動，誓要拯救人類！今日（11月5日）下午三點，Leon喺自己嘅社交網站上upload咗段廣告片，廣告入面佢再次以「明福俠」嘅身份現身，佢着住套黑色西裝，梳咗個靚頭，每個樣都CHOK到爆，迷死一眾網民！片段上載短短兩個鐘已經有成超過十萬點擊率，Leon嘅號召力認真犀利！

今次廣告特別用咗「倒轉」嘅手法拍攝，即係講對白同做動作嘅時候都要調轉做，齋聽都知難度高，不過一啲都冇考起Leon嘅演技。廣告一開始「明福俠」就現身交代自己套盔甲送咗去西雅圖乾洗，不過佢諗諗吓就決定加多5蚊，送去瓦努阿圖乾洗，話安全啲喎！於是佢以黑色西裝上陣，不過佢都仲係嫌自己太高調，拎走埋cute到暈嘅「明福俠」耳仔。

之後「明福俠」就出手打擊病毒，你睇佢左一拳右一拳，再一個轉身，拳拳有力咁擊退病毒。網民留言話以為自己睇緊當年「原振俠」，話Leon仍然咁抽得，寶刀未老咁話。更有大批網民留言話自己都病咗，希望「明福俠」可以出動救埋佢哋！去到呢度本來都未有人發覺成條片係倒轉拍，不過就畀一隻狗仔出賣咗，因為隻狗突然向後行，所以大家先意識到，啱啱「明福俠」嘅打鬥場面，係慢動作倒後快播嚟嘅！網民都大讚Leon演技了得，話畀佢呃咗。

廣告似足英雄大電影咁有片尾彩蛋，輯錄咗部分Leon嘅拍攝花絮，睇佢點樣一邊倒後行一邊揮拳，其中一幕Leon仲因為現場太多粉末而敗走，勁搞笑。片段仲預告遲啲會有完整版嘅拍攝花絮，網民都大叫期待！

網民有話兒

DonXXXXXXng：呢種廣告拍攝手法真係好有創意，概念好好啊！！！最鍾意黎明你不甘侷限於依家common嘅框框，夠creative，正正正！！！！！

SuXXXXXu： 明福俠真身好靚仔呀???#有啲似黎明喎???

MXXXXXSin：好正呀明福俠！❤❤ Hey Guys, this is a CF

KaXXXXXXng： 嘩終於等到明福俠/Leon的出現啦！You are super handsome!!!!!!

個造型好可愛！真係好意外，好驚喜！Leon 我都病，快啲嚟協助我

MaXXXXXng：好型呀!!!明福俠, 你係一個可以同我偶像Leon平排同一級都咁型嘅。。。世上得你咋！