劉愷威傳夜訪女拍檔四粒鐘

藝人劉愷威同楊冪婚後因工作關係平日聚少離多，不時傳出感情有變，今日有大陸媒體指劉愷威與同劇大陸女演員王鷗交往密切。

王鷗為劉愷威慶生

最近劉愷威喺新疆與女拍檔王鷗拍攝新劇《莽荒紀》。話說上月13號係劉愷威生日，劇組人員為劉愷威慶生，當時王鷗仲幫壽星仔劉愷威戴上王冠帽，兩人關係似乎好熟絡。到咗10月14號，由於拍攝當地刮起大風沙，劇組被逼暫停拍攝，一班工作人員於是留喺王鷗酒店房間圍威喂開心聚會。

有指當晚大約8點幾，劉愷威現身同大家一齊玩，歡聚過後，大家各自散Band返房瞓覺，第2日如常繼續拍攝。不過到咗翌日晚上大約7點幾，有指王鷗由助手陪同下返回酒店房休息，助手然後離開，隔咗冇幾耐之後就到劉愷威現身酒店，大約四個鐘後，有人目睹劉愷威離開酒店。另外，有指劉愷威早前同王鷗拍攝《周末父母》時，亦被影到一齊打邊爐。

之後大陸繼續爆料，指劉愷威和王鷗曾經半夜凌晨一起去看電影《發條城市》，而這部電影正是王鷗出演。

雙方未有回應

事件傳出後，劉愷威與王鷗對此暫未有回應，不過劉愷威嘅工作人員就回應指由於劇本每日都可能有改動，所以劇組演員經常開會臨時調整劇本，兩人只係對劇本而已，而劇組人員亦好清楚呢個工作狀態。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon