瘦到見骨！香香話要食叉燒增肥
無綫花旦岑麗香在旺角為酒店剪綵，愈來愈瘦的香香着上tube dress也欠缺睇頭，可以話係瘦到見骨，似乎有必要增磅！受訪時，香香笑言要食多點叉燒增肥，問到上圍可有縮水？她說：「瘦咗少少啦，ok嘅，呢排工作有少少忙。（男友強強唔畀飯你食？）所以咪要喺呢度食叉燒囉，頭先食叉燒最想有一碗飯。」
食得鹹魚抵得渴
香香指去旅行揀酒店最着重酒店泳池，講到她曾被拍得與男友強強在酒店泳池戲水，她說：「去旅行行程唔使塞到爆，可以喺酒店relax吓。（有冇被偷影陰影？）開頭唔慣嘅，但又唔係做咗咩錯事，都係玩吓水、游吓水，去泳池唔着三點式着咩呢？下次着一件頭囉，但一件頭都可以好sexy㗎！（提高警覺？）其實做藝人已經有警覺性，但係私人時間，又唔係做錯事、又唔犯法、又唔係對唔住人，做啲正常人嘅嘢，唔應該擔心咁多。（強強會唔會唔慣畀人偷影？）佢唔係娛樂圈人，會有啲唔慣，自己都試過。今日阿媽教咗我一句成語，食得鹹魚抵得渴，要自己調節心態。」香香又謂希望快點見到男友，透露年底對方會來港探望。