重提台慶被詩詠連摑　洪永城即面都紅晒？

藝人洪永城到電台出席訪問，講到無綫台慶趣劇被女友唐詩詠連摑兩巴掌，可有嬲女友打到啪啪聲？永城表示：「唔會，台慶開心嘅，點會耿耿於懷，詩詠佢係啱啱打正咪嘅附近先有咁效果，相信佢將幾年怨氣，平時發洩唔到，今次乘機一次過發洩。」講到是否因他欠安全感？永城笑言：「呢個問題要問佢，我就覺得做得唔錯。（但一講呢個話題你就面都紅晒？）冇吖，有咩，我啱啱西藏返嚟曬紅咗啫。」

對袁偉豪岑杏賢分手感愕然

對袁偉豪和岑杏賢分手是否感可惜？永城謂：「 當然啦，我哋朋友見到佢都唔覺，但係當然深入嘅問題係佢哋兩個先知，咁分手係好愕然，因為台慶之後都有一齊去食飯。（坐埋一齊？）係呀。」問到袁偉豪和黃智雯拍戲時竟同飲一支水？永城謂：「環保啫，膠樽唔能夠浪費。（如果你咁解釋你估詩詠會唔會接受？）唔知，我有自備水樽嘅。」