鍾舒漫許靖韻陳凱彤化身飛天豬

歌手鍾舒漫（Sherman）、許靖韻（Angela）及陳凱彤（Lilian）組成「音樂與豬」參加飛行日活動，三人穿上粉紅小豬裝上陣，起飛前更在台上上演了被豬肉佬追斬的情節，並配上吳業坤的旁白。接着Sherman與Angela就負責推坐在飛行器上的Lilian在6米高台上飛落海，兩人見Lilian落水後，猶疑一輪才跟着跳落海。

受訪時，駕駛着飛行器落海的Lilian表示當時感受到飛行器正解體，但滑翔器就卡住了她的豬仔頭盔，令她在海裏飲了4啖水。Angela笑謂Lilian坐上飛行器落海反而冇咁驚，她與Sherman一度淆底不敢落水：「因為我哋推佢，佢係被迫，我哋本身應承3個一齊飛落海，我哋去到臨落去嗰度就開始驚喇，我同Sherman就企咗喺度。」Sherman亦笑說：「因為我哋未見過個台，冇諗過咁高，高到有一吓覺得不如算啦。」不過三人對於第一次「跳海」亦大呼好玩！

問到可會有下一次？三人異口同聲說一定會，又笑謂已約好再一起極限挑戰：「sky diving、Bungy jump嗰啲，繼續極限挑戰！」Lilian表示本身亦喜歡玩刺激活動，Angela亦謂喜歡玩機動遊戲：「但Sherman唔係架，佢好似本身好驚。」Sherman就澄清說：「我讀書時候都會玩嘅，依家就少啲，但呢啲場合大家一條心，跳係應該嘅，不過今次我都有啲輕看咗。今次最大得着除咗我哋三個人合作嘅過程，同埋有啲嘢你覺得好恐怖，但你決定咗去，都係得一吓啫，冇乜嘢。」提到坤坤為她們錄旁白，她們表示因覺得對方搞笑：「我哋想搞笑for fun！」

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon