帶埋囡囡返香港　嘉欣唔介意母女檔搵銀

藝人鍾嘉欣到大埔超級城出席「熊抱英倫聖誕揭幕禮」，她以Tube Dress現身，高貴華麗，她表示做了媽媽後，體重增加，她說：「外表睇唔係好覺，但我的確比之前體重唔同咗，我懷疑係餵人奶嘅關係，但重咗幾多就唔好講。今日條裙好長，我着咗4吋高踭鞋，有對5吋，我已經冇着喇！今日呢個工作傾咗一段時間，上次返香港，嗰個活動比較私人，我想見吓啲粉絲，所以今日特別開心。」

會做「空中飛人」

嘉欣又指會留港長達一星期，她說：「今次會留個幾禮拜，會拍廣告，係關於BB嘅嘢，唔係母女檔，但我同老公傾過，如果將來有適合嘅產品，我哋母女檔係OK嘅！（一家三口呢？）唔得，老公驚咗傳媒！今次BB女都有返嚟香港，老公要返工冇一齊返，佢梗唔捨得我哋兩母女啦，但明白我嘅工作喺香港，嚟緊我都好多機會做『空中飛人』。（做多啲工作分擔奶粉錢？）唔使，呢樣嘢留畀老公！」

幫君馨守秘密

問到會否與王君馨等好姊妹約見面？嘉欣說：「佢哋都好忙，之前忙台慶，嚟緊又頒獎禮，又要拍劇。（會為王君馨結婚做姊妹？）佢仲傾緊細節，未透露得住，但我結婚時，姊妹好保護我，所以我都要保守秘密。」

為囡囡推《溏心風暴3》

問到何時再拍劇？嘉欣說：「之前有傾過《溏心風暴3》，但我要餵人奶，需要多一年時間至可以接長啲嘅工作。（你算唔算係宣布全面復出？）我都冇退出過，傳媒寫話我老公唔畀我工作，完全冇咁嘅事，我生B take咗個break啫！（同唱片公司嘅吳若希有BB，你會唔會做多啲音樂工作？）我知道佢有BB，但音樂工作我要問番Herman哥（何哲圖，星夢娛樂CEO）。」

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon