Eric So口甜舌滑冧王菀之：肥瘦一樣靚

Rapper歌手MasterMic與王菀之老公Eric So（蘇勳）出席玩具展活動，兩人分別為大會創作主題曲及吉祥物。接受訪問時，MasterMic透露自己好有童心，因為依家對好多大人嚟講係童年回憶，而自己會收藏設計師設計的玩具、電影模型等玩具。問到係咪會揼好多錢落去買玩具？MasterMic笑言：「會呀，好花錢！不過香港好少地方會舉辦玩具展。」問到可會想設計玩具？他直言有這個想法，亦有可能於明年推出專輯時同時加推自己的模型：「大家都知我健碩嘅身形，肌肉幾有線條，好多女fans得唔到我個人，可以得到我嘅figure！」

另外，Eric表示今次應朋友邀請而設計吉祥物，不過前幾年因為不在香港，所以未能參與這個活動。其後問到是否幫太太王菀之與張敬軒的演唱會設計公仔？他指之前已經發布了，但就未有新方向。至於提到近日娛樂圈喜事連連，可會同太太開始造人計劃？他笑言：「咁我恭喜佢哋啦。（有冇陪Ivana減肥？）唔使我陪啦。（肥靚啲定瘦靚啲？）一樣咁靚。」