King Sir堅好戲！黃建東爆粗廢青夠貼地

藝人黃建東（Derek）因較早前惡搞日本熱爆洗腦神曲《Pen-Pineapple-Apple-Pen》（PPAP）而人氣急升，之後仲keep住拍新片放上社交平台同網民分享，雖然其他作品未有其處女作嘅反應咁熱烈，但仍獲得唔少網民支持。而公司TVB對Derek嘅搞鬼創作亦非常欣賞，前排就畀佢拍咗一段惡搞台慶劇《幕後玩家》嘅短片，畀機會佢發揮之餘，同時又可以為劇集宣傳，可謂一舉兩得！

爆粗援交睇咸片樣樣齊

最近Derek又有新作品，今次仲升呢同戲劇大師鍾景輝（King Sir）合作，呢個組合都算強勁！今次以《白紙》為題嘅短片有成10分鐘咁長，內容講Derek去TVB應徵做編劇時，大膽指TVB一台獨大，又批評啲家庭倫理劇太「離地」，而上司King Sir就叫佢度一個20集嘅劇本。Derek就以變態家庭為題－《不愛回家》，除咗有阿爸睇咸片，仲有發現阿媽匿喺廚房索索吓、鼻上有白色粉末，嫲嫲化身學生妹做援交，意識非常大膽！而且用語仲好「貼地」：「你老母又唔煮飯！」、「X你個街！」。

禁室培慾意識大膽

有一幕講到Derek綁起飾演女警嘅黃文意，正準備禁室培慾之際，反而令黃文意產生被虐快感，最估唔到嘅係黃文意竟然係人妖！最後講到套劇播出後得10點，仲有十萬宗投訴，被King Sir鬧佢：「呢度係電視台，係有社會責任，唔同你喺屋企可以閂埋度門亂咁拍片。」

網民勁讚好戲

Derek今次造型新鮮，有梳蛋撻頭嘅斯文造型，又有頹廢年青造型，唔少網民大讚今次作品夠晒突破，除咗讚佢演技好有發揮之外，仲話好期待佢嘅新作品，畀心機呀Derek！

網民有話兒

Bxxxs Woxx Cxxn Fxx：WA（嘩）....好突破咁喎

Pxxl Cxxx：你既（嘅）努力，一定會有回報既（嘅）！支持你！

Mxxxy Hx：期待你多啲作品，正呀喂～?

Axx Lx：好有發揮喎！ 有 KING SIR， 正到爆！ <3 <3 <3 <3

Bxxty Bxxxy Bexxx：即刻DL.....繼續追?

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon