掛住做功課　朱千雪冇時間搵男友

「宅男女神」朱千雪（雪雪）着住條充滿童話公主氣息嘅裙，出席沙田舉行嘅主題卡通人物活動，跟現場觀眾玩遊戲及送禮物，雪雪更即席炮製甜品，請在場圍觀嘅市民品嘗。着住四吋高踭鞋嘅雪雪上落樓梯時顯得有啲論盡，捧住甜品的她險將甜品掉到一地都係，好彩最後只係掉咗一個落地，觀眾仲可以品嘗到女神炮製嘅食物。雪雪表示由細到大都鍾意儲卡通人物嘅物品，好似郵票、杯、雨傘等，所以成日都畀媽媽話佢屋企太多嘢。最近不少女神宣布被「私有化」，雪雪表示唔急於拍拖，現時仍進修法律，平時忙做功課，拍劇都要抽時間。她笑說：「等過咗聖誕先搵男朋友，因為聖誕要拍劇。依家仲讀緊法律，所有時間做功課。我想繼續喺娛樂圈發展，平時係抽時間拍劇。」