學周柏豪秘婚？翠如呻冇人向佢求婚

藝人黃翠如及歌手林奕匡到上水出席聖誕活動，忙於拍攝劇集《使徒行者2》的翠如由深圳趕返港，但因途中遇上交通意外而遲到35分鐘，她一到場即向在場記者致歉，並表示已提早出發，但無奈前面車輛發生交通意外。講到拍攝《使》劇，翠如表示相當順利：「去咗好多靚景同廢墟拍攝，再睇番之前泰國嘅片，三哥苗僑偉真係好型，有好多飛車打鬥戲，今次係用電影機器拍，質感好好，可以拍呢個大製作，我都要畀心機。」

翠如又表示跟新婚的周柏豪有不少對手戲：「佢依家就去咗柬埔寨，但係新婚之後都有見過佢，好戥佢開心，佢女友好型，佢又好型，之前同佢合作《愛情來的時候2》都有傾過愛情嘢。（有冇感染到你都想結婚？）我冇佢咁犀利，拍拍吓劇可以走去搞婚禮，聽聞係佢女友負責好多籌備工夫，花咗好多心思。（秘婚對你嚟講難啲？）呢樣係好驚喜嘅事，不過對我嚟講太早，都冇人求婚！（同男友蕭正楠有冇傾過？）冇㗎！拍拖以來大家都要工作，拍拖時間唔夠，未好深了解。（認定咗佢未？）嘩？你依家咁問！不如你哋問佢啦！」