娛樂專題:薛凱琪做盛女唔急嫁

20161208
東網電視
更多新聞短片
依家啲人結婚愈嚟愈遲,真係唔驚。
成長過程中難免要付出代價,薛凱琪率直的個性常常無意間傷害別人,令她一度想將自己的稜角磨平,但經過長時間的自我反思,她慢慢學識做隻美麗而不傷人的獨角獸!現年35歲的她坦言並不急於脫離「盛女」行列,就算能趕上其他人的進度結婚生仔,是否代表她就會得到幸福?
獨角獸反思十年
由推出歌曲《給十年後的我》至今剛好十年,薛凱琪(Fiona)今年再以一首《十年後的我》作為這十年的成長總結。「成長的代價 還需要更多嗎?」Fiona在感情路上跌過、痛過,知道甚麼類型的男性不適合自己;她將大部分光陰都投放在演藝工作,犧牲享受人生的機會,不過她未有因此而感後悔:「有時我會諗,我得到一啲嘢係人哋得唔到,例如我嘅成就,成就之後帶畀我更奇妙嘅,就係我不斷收到Fans嘅信,話我影響到佢哋嘅生命向一個正面嘅方向,同埋帶到好多歡樂畀大家。」
無心之失
從前的Fiona曾因直言、說話不懂修飾而傷害不少身邊人,並無惡意的她其實傷得更深,曾因此想磨平自己的稜角:「我真係唔識,我當我係獨角獸,明明隻角好靚,但有時我會啄親人哋,係無意嘅,所以有一排我好想磨平佢!」與其一味怪責別人的誤解,她選擇自我反思:「有啲情況係唔需要咁直言,但我亦都唔鍾意講大話,如果要用技巧或者技術形容,我覺得太過大人,我希望用一個體諒到你、愛你嘅方法去講一啲真話。」今年她終於學會好好善用她的稜角,可以做自己之餘,亦不會傷害到別人:「原來我擰歪少少個頭,或者行近少少個草原遮一遮,都可以做一隻好靚嘅獨角獸,而你隻角亦都唔會傷害到人。最緊要係做自己之餘,你唔係大晒,你唔好hurt到人哋,要搵一個平衡,今年我覺得我慢慢開始搵到。」
單身必有因
圈中不少黃金盛女近年都陸續找到好歸宿,踏入人生另一階段,Fiona坦言曾經以為自己會在30歲前結婚:「十年前會覺得薛凱琪你唔係到咗30歲都未結婚呀?會覺得女人夠30歲未結婚,咁我喺度做緊咩呀?以前會睇盡頭睇得狹窄啲。」不知不覺她今年已35歲,仍然孑然一身的她知道上天安排必有原因:「可能你同未來老公要繼續磨練,我當touch wood 55歲先遇到對方、結到婚,可能嗰時先係我哋嘅perfect timing!人哋25歲結婚生仔,唔代表我趕得上就幸福,拍拖結婚生仔最美麗係搵到個對嘅人,邊個話嗰個Mr. Right一定30歲出現?」她亦毫不介意被標籤為「盛女」,更想勉勵其他同樣被標籤的女性:「呢個Terms會用嘅地方好少,唔好因為咁細嘅圈子、咁細嘅說話去困擾自己,我想同好多女仔講,就算你有人要、有人娶,唔代表幸福,究竟你要幸福定一個安全感嘅標籤呢?」
「發夢」做電影導演
若再要跟十年後的自己說話,Fiona希望自己心裏繼續保持着問號:「只有不斷問自己問題,你先至會進步,唔好覺得你已經最聰明,知咩係愛,其實要不斷問自己,每一年答案其實都唔同,我對於生命好多嘢都唔會有一個總結,繼續去進步、感受,覺得原來可以更加快樂。」
熱愛唱歌演戲、發揮創意的Fiona,亦希望十年後仍然能在娛樂圈發光發熱,並嘗試更多的挑戰,包括為電影執導:「我太多嘢想做,拍完MV又想做電影導演,我已經有一個劇本喺度,之前拍咗套微電影反應好好,但我會想等我幕前冇咁忙嘅時候,可能有一日幕前冇人想搵我拍戲喇,我就會拍我已經有劇本嘅電影。」雖然她不願透露太多劇本內容,但原來是來自她連續兩晚所發的夢:「我覺得兩晚嘅夢應該有關聯嘅,同埋都令我喊醒,雖然第二日要做嘢,但我用咗一晚嘅時間,冇瞓覺,去將呢兩晚嘅夢串連變成一個古仔。」
髮型:Horace Tse@hair play
化妝:Mon Chun@gmail.com
服裝:@d_antidote,@runway_workshop
__________________________
想聽歌?想睇MTV?想了解本地Indie Band資訊
快啲click入「聲大夾樂」專頁: http://on.cc/musicon