東網民選TV K&Q:陳展鵬胡定欣遙遙領先
今年《萬千星輝頒獎典禮2016》將於12月18日隆重舉行,向來緊貼娛樂圈消息嘅東網巨星,已於昨日開設《東網民選TV King & Queen 2016》facebook專頁,精選出10位準視后、準視帝嘅演出精華片畀大家欣賞,以便投票選出新一屆民選視帝、視后!截至今日晚上七點,首日嘅票王、票后順利誕生。

陳展鵬獲最多粉絲支持

視帝方面競爭相當激烈,由早前連攞新加坡同馬國兩大視帝嘅陳展鵬,憑Hit爆劇集《城寨英雄》以563票高踞首日「TV King」榜首。 而展鵬嘅粉絲亦十分踴躍,更一面倒洗版留言撐偶像。至於第二位,則由郭晉安憑熱播劇集《致命復活》以115票穩守。而第三位就出現爭崩頭嘅情況,最終由大人細路都啱嘅歐陽震華,憑104票力壓獲101票嘅黃宗澤,換言之,即係第三位同第四年僅僅相差3票咋!另外,值得一提嘅係,歐陽震華雖然落敗首日「TV King」嘅寶座,但以短片瀏覽量嚟講,佢以3,173觀看次數遠遠拋離其他對手㗎!

胡定欣遙遙領先

視后方面,由展鵬嘅最佳拍檔胡定欣,憑《城寨英雄》以2,079嘅高票大幅拋離對手,穩坐首日「TV Queen」榜首。至於第二位,則有民選港姐朱千雪,憑《EU超時任務》以90票勇奪。而第三位,就有《幕後玩家》嘅黃翠如,雖然佢僅輸對手朱千雪4票,但以短片瀏覽量嚟計,翠如係高企第二位㗎!

馬國明蔡思貝墊底

至於包尾嘅,視帝方面有《為食神探》嘅馬國明,而視后方面則有《鐵馬戰車》嘅蔡思貝,睇嚟佢哋要急起直追喇!

投票方法

為咗大家投票投得更得心應手,呢個時候再講一次投票方法,只需去《東網民選TV King》同《東網民選TV Queen》Facebook專頁,喺心水視帝視后Profile度畀Like,就已經投出神聖一票。呢個投票最正係完全不設上限,只要你覺得好戲嘅,都可以畀Like!活動只搞到12月17日下午,除咗投票外,仲要記得分享到你偶像嘅粉絲頁幫手拉票,立即就到專頁LIKE&SHARE,總動員撐佢哋做King & Queen!

《東網民選TV King》投票連結:
https://goo.gl/qvkWHI

《東網民選TV Queen》投票連結:
https://goo.gl/6ucb2W