郭晉安同「仔仔」相認 網民睇到爆喊

20161211
東網電視
更多新聞短片
郭晉安喺戲中同仔仔相認,相當感動,搞到有網民爆喊囉!
呢排最多人講嘅話題係咩?咪就係全城競猜邊個係無綫劇《致命復活》嘅「BIG BOSS」囉!劇中郭晉安(安仔)喺越南畀人綁架足足十年,綁架生活苦不堪言,安仔要生食青蛙同蛇嚟維生,獲救後仲發現老婆萬綺雯改嫁咗,真係慘絕人寰!原來安仔咁「慘慘豬」,背後有一個(抑或係多個)「BIG BOSS」策劃,而「BIG BOSS」嘅身份都開始浮面,難怪一班觀眾晚晚都緊貼劇情,用金精火眼去睇「邊個係人,邊個係鬼」!
復仇「BIG BOSS」
《致》最近幾集講到安仔成魔,向「BIG BOSS」展開復仇,劇情真係愈嚟愈緊湊,而前晚一集觀眾睇到肉緊又眼濕濕,因為有好多「洋蔥」!劇中安仔同患有自閉症嘅仔仔「子聰」本來關係好好,不過安仔失蹤咗咁耐,加上早前官司纏身,令到仔仔誤會佢,關係一度惡化。
嗌安仔做「小丑爸爸」
為咗同仔仔修補感情,安仔不惜隱身做小丑,默默守護住仔仔之餘,又陪佢玩兼鼓勵佢。正當安仔以為仔仔咩都唔知,呢個時候「子聰」用一個火柴遊戲,就係細個嘅時候安仔成日陪佢玩嘅遊戲,佢話畀安仔知嚟自己係知道真相嘅,佢仲主動嗌安仔做「小丑爸爸」,其後兩父子仲溫馨相擁,相當感人!見到安仔同仔仔終於重修關係,唔少網友都抵佢高興又覺得感動,佢哋睇到「洋蔥」一幕直情眼淚同鼻水都流晒出嚟,仲話喊到紙巾都用完咁誇張㖭!
撐安仔拎視帝
而「myTV SUPER」亦剪輯咗安仔同「子聰」嘅溫情片段放上網,繼續大派「洋蔥」整喊大家!唔少網友大讚安仔好好戲,希望力推佢攞到視帝,佢哋仲留意到飾演「子聰」嘅童星陳子樂演技都唔差,要演患有自閉症嘅角色真係難度十足,細細個已經咁好戲,大個仲得了?子樂繼續加油呀!
網民有話兒:
XXXyLaam:呢part真係好感人,我睇到都忍唔住喊,喊到用晒D(啲)紙巾!
XXkPuioXX:真係好,原来仔仔冇忘記佢。
斯凱X:而(依)家做人父母,睇到呢幕有更深感受,父母真係可以為子女,不惜一切做任何事,因為好愛佢地(哋)。
CanXXXong:其實要演有自閉症唔容易,童星嚟講子聰真係做得好好,繼續加油!
KatherinXXXX:安仔真係好好戲,今年一定要拎視帝,睇好你!
__________________________
想聽歌?想睇MTV?想了解本地Indie Band資訊
快啲click入「聲大夾樂」專頁: http://on.cc/musicon