相隔七年再與子華合作　阿佘做「阿嫂」

藝人佘詩曼出席《兩岸四地青年微電影大賽》頒獎典禮，對於將與舊拍檔黃子華合作電影，阿佘透露雙方已有七年沒有合作，上一次已是無綫劇集《絕代商驕》，她謂：「今次劇本已改動多次，有試過叫我演社團大佬女人，但最終版本未定，只知角色係搞笑，仲會有好多子華朋友客串。」

問到可有其他電影接洽？阿佘表示有一部恐怖片邀她演出，成事的話將於下月中開拍，雖然角色保密，但怕鬼的她笑指正在掙扎，她謂：「諗咗好耐，我睇劇本都晏晝睇，夜晚瞓覺都唔敢閂燈瞓，仲發噩夢都見鬼。（咁接唔接？）唔知呀！有同製作人傾，對方話唔驚嘅拜神囉！有問佢哋時會拜神，要點拜法，總之我全部都參與。」談到聖誕節，阿佘表示會與家人及朋友度過，問到廚藝了得的她是否吸引更多男性？她笑謂：「唔係個個都食到我煮嘅嘢㗎！」