宣萱讚有進步　王君馨意外：好開心感動

藝人王君馨（Grace）憑《城寨英雄》「花曼」一角奪得「最受歡迎電視女角色」，頒獎嘉賓宣萱喺台上大大啖錫落Grace塊面，搞到Grace塊面有一個大紅唇印，接受訪問時，Grace笑言呢個係good luck kiss：「以前同宣萱合作《刑警》，嗰次係我第一套電視劇，中文唔好個人又好緊張，依家聽到宣萱話我有進步，真係好開心好感動同意外。」

喺台上講多謝嘅時候，Grace唔記得多謝未來老公，Grace話因為講緊中文唔記得多謝佢：「佢喺美國應該瞓緊覺冇睇，多謝呢啲心知就ok，遲啲先至再慶祝。」

Grace選擇出席頒獎禮，就冇去好姊妹岑麗香嘅婚禮，Grace話：「香香都話好想我去，佢話知道我放咗好多心機喺工作上面，攞到獎就係最大嘅結婚禮物。」Grace透露31號就會見到香香同佢一齊出席倒數活動。