賴慰玲裝假狗連升5Cup：效果都好滿意

藝人賴慰玲（Winki）到理大為舞台劇進行總綵排，Winki劇中飾演經常發姣的女工人， 不停騷首弄姿擺出S型pose，見她今日身材明顯玲瓏浮凸有前有後，她笑認有「裝假狗」上圍升了四至五Cup， 她笑說：「因為我起點太低，要加強視覺效果，令最後排觀眾都睇到，人生有幾可呀？呢排要習慣下咁高Cup嘅身材！（有冇腰痛？）未嘅，但行路要好注意曲線，另外原來pat pat都有得加墊，我都係第一次知，效果大家都好滿意。」

講到好姊妹孫慧雪明日舉行婚禮，Winki表示因晚上要演出舞台劇，只能在早上參與玩新郎環節：「唔好意思呢排冇乜參與到，但聽朝一定會玩盡！（阿雪老公玩唔玩得？）玩得嘅，就算平時唔係，呢個時候都要玩得啦！（會唔會帶啲墊畀姊妹？）唔使啦，阿雪好夠用！」