蝦頭生擒袁偉豪　網友大嗌重口味

藝人袁偉豪同前港姐岑杏賢之前突然冇啦啦話分手，搞到全城嘩然，皆因個個都睇好佢同岑杏賢結婚㗎嘛！雖然袁偉豪開晒綠燈話想翻撻岑杏賢，但大家都話順其自然，但點知轉過頭袁偉豪就突然結婚！點解嘅？點解嘅？唔係真㗎嘛？

大家唔使咁緊張，真係唔係真㗎！講緊只不過係尋晚無綫劇集《流氓皇帝》嘅劇情，講本身做山寨首領嘅楊詩敏（蝦頭）睇中咗袁偉豪，於是捉佢返去困住佢，一心諗住同佢結婚。做得山寨首領就梗係唔會講嘢斯斯文文啦，成個男人婆嘅蝦頭為咗得到袁偉豪嘅心，向黃智雯請求點樣做一個真女人，學咗唔少嘢嘅蝦頭，就開始發夢自我幻想，模擬自己點同袁偉豪溫馨甜蜜！

講到呢個幻想世界，唔少網友睇完都大叫重口味，話蝦頭今次真係生擒男神袁偉豪！首先係蝦頭一行幾人去山洞搵袁偉豪，袁偉豪已經露晒心口同手臂等蝦頭嚟搵佢，之後蝦頭見到即刻攬實袁偉豪，之後袁偉豪見到蝦頭即時用手輕輕咁撫摸蝦頭塊面，之後戲肉嚟啦，佢仲同蝦頭嘴對嘴「激」情擁吻，睇到呢到真係令成班網友睇到嘩嘩聲，話蝦頭咁就生擒咗袁偉豪，而蝦頭個樣仲好冧添！

鏡頭一轉，蝦頭已經幻想同袁偉豪拜堂結婚，但係袁偉豪就反串着裙褂，真係令到唔少網友都大叫好驚訝同好搞笑。最後蝦頭冇啦啦同袁偉豪突然對戰，點知袁偉豪突然拎個斧頭劈落佢個頭度，當然就劈唔中啦，蝦頭啲頭髮好似女神咁「仙女散花」，仲要含情脈脈咁望住袁偉豪，係呢個時候鏡頭特寫袁偉豪個心口同手臂，隔住個Mon都Feel到個胸肌係實滴滴㗎，令到唔少網友都話睇到流晒鼻血，話袁偉豪真係好大隻！唔少網友都話呢場咁重口味嘅戲份真係好有娛樂性，仲向蝦頭大呼「還我袁偉豪」，但仍有人讚蝦頭做得好好又夠放，完全係豁出去！

網民有話兒：

Sxxt xxok：我都祝你們白頭到老

Mxy Cxxw：勁好演技。被妳吸引得目不轉睛。

Kexxin xxm：蝦頭做得好放！昨晚冬至飯一衆親友看好開心！加油！

shxxxy Mx：畀返（番）個袁偉豪我！