陳山聰多謝《同盟》監製：由頭到尾冇奸過　

藝人陳山聰出席劇集《同盟》煞科宴，他說：「好唔捨得，雖然拍咗唔係好長時間，只係3個月啫，但大家經歷咗好多，由第一日開工拍打戲，到同鮑姐（鮑起靜）熟落，到去台灣拍外景，好多好多好難忘嘅回憶，自己今次可以同一班咁有默契嘅演員合作，同《城寨英雄》嘅班底合作，我都好多謝監製文偉鴻畀呢個機會我，佢令我有一個不一樣嘅陳山聰，角色正直正氣，由頭到尾無奸過！希望有機會再同大家合作。」

山聰又謂難忘打戲過招，他說：「都好唔捨得打戲，畀我練到好多嘢。（有冇受傷？）慶幸冇乜受傷，我估唔到自己時裝劇打戲可以記到二十幾招，係好深刻嘅感受！（想攞獎？）冇諗過，觀眾鍾意就得喇！」