未紅辛酸史！陳展鵬首映冇人理避走廁所

「視帝」陳展鵬於坑口出席商場活動，打扮得酷似機師的他笑言今日以「車長Look」示人。問到是否成為視帝後有更多工作？展鵬稱此工作於攞獎前已接下。問他以未攞獎的身價接job可感到蝕底？展鵬透露近日經理人反而幫他接下「減價job」：「因為嗰個客戶一直有搵我合作，大家有來有往。」

買大屋一家人住

有指續約時由過往三千蚊一集，要求增至三萬蚊一集？展鵬否認：「計條數，如果三萬蚊一集，我一年拍兩套劇，咁咪好易上車（買樓）？但我仲未上車，證明唔係，我仲要努力。報道指嘅阿姐阿哥肯定唔止呢個價（意指三萬蚊），我要更努力！」問他是否有意買磚頭置業？展鵬稱今年內應未能成事：「香港人個個都想，今年應該唔得，想買間夠成家人住。（工作上冇加價？）梗係冇啦！續約細節得高層知道。攞獎係過程同一份肯定，希望今年可以行遠啲！」

當楊紹鴻係伯樂

講到前亞視監製楊紹鴻早前出書提及，當中指展鵬因拒拍李小龍特輯而被雪藏，展鵬說：「係真㗎，但只係爆發點，之前累積好多嘢，而且指雪我嗰半年，我係冇簽約，因為高層調動。我當時做所有嘢都唔知點計數。當時佢哋想我着李小龍貼身衫，但我諗要出街都畀我練少少。雖然收視唔係咁理想，但都想做好件事。亞視畀機會我學習，楊紹鴻係我伯樂。」

入行21年自認老屎忽

又有指展鵬曾於出席首映時，怕冇人理會而躲於廁所至開場，展鵬說：「有次去到企喺度都冇人影，覺得唔好意思。所以下次去就搵位避，入廁所到差不多開場再出嚟，唔通自己戇居居企喺度。（依家唔使匿廁所？）希望啦，急都要去洗手間嘅。」問他現時攞獎成為視帝，有否自覺爭氣？展鵬就自認年資老：「唔覺咩爭唔爭氣，當時覺得做呢行又唔似呢行，所以失落。依家都唔係咩威水，無綫多咗人認識，多咗朋友。我年資都上下，入行21年，老屎忽。」