方東昇又爆金句：一試無妨　再試投降

天王黎明素來有「金句王」之稱，基本上每講五句說話，梗有一句係發人深省嘅金句，簡直塞錢落大家袋，好似「唔會空肚食早餐」、「核心嘅外圍係核心嘅內圍」及「拍拖同撞鬼一樣係講緣份」等等，難怪一班網友都將金句背熟，所以話「金句王」絕非浪得虛名。不過，近期有人竟然挑機，想同黎明挑戰「金句王」寶座喎！

邊個咁大膽？咪就係無綫主播方東昇，呢位新聞王子畀人感覺嚴肅正經，估唔到主持節目第一及第二輯《世界零距離》時表現生動，不時搞GAG之餘，仲講出無數令人意想唔到嘅金句，觀眾們到依家仲記得「工欲善其事，不要發脾氣」、「蛋有蛋味，企鵝蛋有企鵝蛋味」呢啲金句。節目反應咁好，梗係要食住個勢繼續上啦，《世》呢排添食至第三輯，繼續由方東昇擔正大旗，趣味度大增，連金句都升呢埋添！

「贏在赤道線」

《世III》尋晚播出第一集，方東昇帶大家探索非洲埃塞俄比亞，一開頭已經抽乾啲怪獸家長要小朋友「贏在起跑線」，仲玩埋押韻「我哋要贏在赤道線」，實在靚抽！之後更爆出一連串金句，好似佢嘗試當地食品英吉拉餅，所畀嘅食評係「一試無妨，再試投降」，唔單止押韻，仲要轉彎末角講出難食程度爆燈，連網友都讚佢口齒伶俐，啲金句夠晒抵死又生鬼！其他金句仲有「原來花開，真係可以富貴」，唔只爆笑咁簡單，聽落仲好有道理，絕對拍得住黎明啲金句！

獲網友封為新一代「金句王」嘅方東昇，點止咁少金句先，以下精選埋其他抵死金句，畀大家回味一番！「讀萬卷書不如行萬里路，行萬里路一定要行赤道」、「歲月不饒人，起身見頭暈」、「織織復織織，織極都唔識」，真係句句都笑爆人個肚！

網民有話兒：

SamXXXLi：繼黎明係金句王之後，方東昇就係新金句王！

XXXKeungLi：同之前兩輯一樣，主持得好生鬼，好搞笑，正！

MeimeiXXXX：係咪新聞主播特別口齒伶俐，所以先有多金句彈出嚟？

XXbelYuXX：方東昇可以同Ben Sir合作，應該可以好似李錦聯同安德尊咁擦出愛火花XDD