郭偉亮硬食曹星如30拳仲嗌過癮

音樂人郭偉亮（Eric）首次與曹星如合拍廣告，於廣告中扮Iron Man扮到出晒位的他，接受電話訪問時稱是曹星如的Fans：「之前有捧佢嘅拳賽，好欣賞佢，拍廣告時先正式有機會認識，佢個人好謙虛，私底下係一個細路，但上到台就變野獸，可以想像到佢喺打拳度真係落咗好多苦功。」他又提到拍攝一場被曹星如打臉的戲，足足硬食了二、三十拳：「佢用右拳打我左邊面，因為要拍打到我塊面唧啲肉出嚟，足足拍咗2、30個Take。」問他可擔心被打傷？他笑說：「唔係我驚，係曹星如驚，因為佢怕打親我，其實我被打仲開心， 因為好少人有機會畀世界冠軍拳手打一拳，我就係為咗呢拳， 特別閉關努力去苦練面部肌肉。」他又表示絕不介意被搶鏡： 「大家一齊玩啦！」又讚曹星如是「香港人嘅真Hero」！

曾江狄龍激讚

曾江及狄龍兩位前輩級演員，合作過後對曹星如均讚不絕口，曾江說：「佢拍嘅時候好放鬆，好有信心，係一個非常唔錯嘅年輕人。」雖然曹星如對鏡頭揮灑自如，廣告一個接一個，但曾江不贊成他入行：「拍廣告嗰日我哋傾咗好耐，佢係一個對打拳好用功嘅人，同埋佢心態好好，唔怕輸，會向着自己嘅目標努力上進，好明白自己嘅優缺點，好專心咁打拳，係一個好有前途嘅小朋友。」

而狄龍直言有看過曹星如的拳賽，覺得對方很有鬥志，是一個形象甚好的人。原本拍攝當日狄龍身在外地拍戲，但知道合作對象是曹星如，即二話不說特別改檔期返港接拍，合作過後，狄龍對曹星如更為欣賞，讚對方主動、積極、有禮貌，亦表示支持他拍戲，因影壇很需要新血，指曹星如只要多磨練演技，絕對有機會大放異彩。