學阿爺廚房　洪永城黃子恆亂整「負評卷」

無綫劇《味想天開》入面洪永城（Tony）同黃子恆（Hugo）兩位主角大鬥廚藝，現實中兩位男神廚藝又點呢？答案當然係，不濟啦！see see TVB上載咗洪永城同黃子恆整春卷嘅片段，真係睇到人飽晒！事關兩位廚房初哥，當塊春卷皮玩具咁玩，真係睇到都唔多開胃囉！

將腐皮係咁舞

一開始Tony就問Hugo：「其實你識唔識煮嘢食？」Hugo就冇正面回應，只係講咗句「試吓煮咪知囉」，果然一試便知龍與鳳，佢哋都係完全唔識下廚嘅！Tony仲好大口氣咁話，要向早前熱爆嘅綜藝節目《阿爺廚房》嘅李家鼎（鼎爺）偷師，即場示範整「負評卷」。Tony首先好有氣勢咁攞起塊腐皮，之後就好雞手鴨腳咁，用把大菜刀切個正方形出嚟。睇番鼎爺，只係三兩下手勢就將成塊腐皮切開一塊塊，仲用盡成塊㖭。Tony切完個正方形出嚟之後，兩個大細路攞住塊腐皮係咁舞，Hugo好搞笑咁話塊腐皮好似理髮店張圍巾，Tony就話似埃及獅身人面像，認真搞笑。

Tony乘機放閃

Hugo突然問Tony：「其實你平時有冇煮嘢食？」Tony即刻乘機放閃：「詩詠整多啦！我就出街食！」真係甜到漏！之後睇到Tony包春卷又包到似模似樣咁喎，一直喺旁邊冇咩貢獻嘅Hugo，終於都出手喇，佢整咗碗杰撻撻嘅生粉水，用嚟黐住啲腐皮，不過嗰碗嘢「杰」到好似「啫喱」咁，真係你食埋我嗰份喇！Tony都忍唔住話：「如果肥媽見到應該會鬧我哋衰仔！毀壞食材！」最後佢哋將舊疑似春卷嘅物體用一隻筷子拮住，Tony更加進入放棄狀態，直接將舊帆船咁嘅嘢就咁放入鑊，Hugo話呢個係「乾煎泰式春卷」，Tony都投降，大叫：「我唔識整呀！呢個係咪整人節目嚟㗎！」

勇士試味！

幾經辛苦，Tony同Hugo皺晒眉咁終於整好個「負評卷」，仲成功搵咗兩位勇士試味！Tony同嗰兩位少女講：「呢個係肥媽同鼎爺特別炮製㗎！」嗰位黑衫少女又真係敢擺入口食，真係勇氣可加，試食當然要講番評價啦，少女講咗三個字：「好脆呀！」重點係入面嘅肉都係熟嘅！Tony個樣即刻得戚到呢，佢自己試完味仲大讚好味，只不過燶咗啲啫！網民就話佢哋兩個煮嘢食過程非常搞笑，應該開番個節目畀佢哋咁話！

網民有話兒

Joxxxxxxan：睇唔出洪永城廚藝原來咁水皮！

Aexxxxxq：肥媽同鼎爺特別炮製，我笑咗

Texxxxxp：個女仔真係勇氣可加呀！

Eaxxxxxn：睇落都ok呀，好似幾好咪！

Wixxxxx4：好得意呀你哋，我都想試！

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon