名人：陳美齡訓練三個仔做書蟲

藝人陳美齡到電台擔任「有聲好書——全港中學生聲演比賽2017」評判，她表示會留意參賽者的聲音、咬字和表現：「十個小朋友自己揀書閱讀一次，再揀五個決賽，希望搵到幾位感動到我，令我睇到畫面、內容同佢哋心裏面嘅感情。因為今次唔睇樣，淨係聽聲。」她透露關於母子或人情的故事較易感動她，但覺得應該要公正地做評判，又認為活動很有意義。說到現今的小朋友有懶音問題，她指每種語言也會出現改變，而多數改變都由年輕人開始，但最重要是閉上眼睛也能聽得明。她表示小朋友多參加這類活動，便有多些興趣閱讀：「會去搵吓自己鍾意睇咩書，或者點樣表達自己，喺公眾場合點樣演說，對佢哋大咗好有幫助。」

曾想訓練二仔做歌手

陳美齡回想以前很喜歡叫三個兒子睇書：「佢哋都變咗書蟲，我讀畀佢哋聽之後，就叫佢哋讀畀媽咪聽，話自己聲都沙晒，然後叫佢哋話畀爸爸聽本書講乜。」經過這些訓練，現在兒子在人前說話也不會怕醜。她又透露二仔唱歌很好聽，有想過訓練他做歌手，不過丈夫很反對，認為娛樂圈不穩定，讀完書才算，她笑言：「點知佢讀完書就做咗工程師，我諗都冇乜希望。（仲好？）睇吓佢鍾意做咩，如果佢有心做娛樂圈，但又做唔到就唔係幾好。我最近都問過佢一次，佢就話好鍾意依家份工，咁咪得囉。」她覺得最重要是子女的夢想，只要完成夢想就是成功。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon