憶入行七年經歷　鄧小巧嘆曾感前路迷惘

參加《超級巨聲》出身的歌手鄧小巧，在電台錄音訪問中透露於教育學院畢業的她主修教育，其實她醉心中國文學，不是老師的材料，09年參加《超級巨聲》的她，之後得到黃金機會主唱電視劇《天天天晴》主題曲的《半杯水》，但這機會竟令她感到前路迷惘，她說：「當時許廷鏗都未有機會唱《我的離開也是愛》，佢曾經同我講過：『你就好啦，有歌！』但對於我：『真係咩？呢啲機會代表咩？』得到一個其他人好想得到嘅機會，但點解自己唔開心呢？因為我本身對音樂製作嘅畫面並唔係咁樣，『唔鍾意公司挑選，幫你安排好？』，我好似只貢獻咗聲帶演繹，冇靈魂咁，冇參與過！更促使我要等約滿離開。」她更說：「錄《半杯水》時我只係花咗三小時，人哋誤以為我唔appreciate（感激）呢啲機會，但唱完呢首主題曲更迷失，唔知自己做咩。」她感謝《半杯水》的出現，令自己知道想要什麼。<br/><br/>感謝家人體恤<br/><br/>鄧小巧揚言入行七年來曾經歷長時間零收入，她感激細家姐身兼兩職賺錢養家，同時身邊好友亦會出手幫忙。談到與細家姐的感情時，她熱淚盈眶說：「細家姐覺得欠咗我，因為細嗰佢曾經差啲將我浸親！當年，佢用僅餘嘅利是錢買咗個結他送畀我！」收入不足時，小巧曾要求分擔家庭負擔，但家姐卻不肯，她說：「佢覺得我都算係個公眾人物，叫我唔好拋頭露面。佢廚師，下晝做一家餐廳，晚上就做摩洛哥餐廳，變咗完全冇私人同休息時間，每日都攰到不得了！」小巧很感激細家姐體恤自己的任性，希望日後賺錢請家姐去旅行。