監製落柯打　唔畀湯盈盈引誘嘉樂再生B

無綫藝員劉丹、單立文、湯盈盈、呂慧儀、羅樂林、馬貫東、蘇韻姿、等在將軍澳電視城為全新處境劇《開心速遞》進行拜神儀式。單立文與湯盈盈劇中有段曖昧關係，單立文笑說：「關係最尾係點都未寫到，保持神祕好啲。」

講到湯盈盈早前笑言要引誘老公錢嘉樂再生多個，她笑說：「唔係，監製話唔可以生住。」單立文笑說：「劇情交代唔知點解有咗咪得囉，一家便宜兩家着。」提到單立文近來接着有《財神駕到》及《乘勝狙擊》出街變「阿婆殺手」，他笑說：「去街市有個阿婆追住送個橙畀我。」