被問200萬飯局價　莊思明嗌網民積口德

藝人莊思明、黎諾懿等昨日為無綫賀年節目《馬家開飯》錄影，對於繼家姐莊思敏後，近日思明也遭網友開價200萬飯局價，對此她謂：「唔明點解會覺得我哋會做，睇完唔會特別唔開心，反而男友楊明唔開心啲。（家姐個價係你五倍喎！）其實呢啲價唔應該喺微博搵，應該搵agent啦！我覺得啲留言好賤，希望2017年啲網民積吓口德啦！」

被老婆禁幫BB改名

而即將榮升父親的諾懿，則表示太太將於4月16日入院生仔，更指太太已下旨不准他參與BB改名，他謂：「佢話我文化水平低，唔好搞到個仔個名好娘，所以改完先畀我睇，連英文名都唔畀，因為佢澳洲讀書，所以我只可旁觀，只怪我細細個唔好好讀書。」