胡杏兒被誤傳有喜：睇牙醫啫！
藝人胡杏兒出席時代廣場舉行的《金龍醒獅賀新歲》活動，盛傳懷孕的她穿上束腰裙、腳踏五吋鬆糕鞋，身形較早前圓潤，更獲大會送上「金菠蘿」吊飾，寓意早生貴子。
對於屢傳懷孕，近日更被拍到在中環睇婦科，但杏兒卻否認佗B：「冇啲咁嘅事，你哋仲緊張過我，好大壓力，有嘅話會話畀大家知，我都未完成手上工作，套內地劇要拍到4月，係延遲咗少少。（影響生仔計劃？）又冇，隨緣啦！（拍完劇全面停工造人？）又唔會，造人唔使咁犀利嘅，依家有睇中醫調理身體，但雜誌影到嗰日我係睇牙醫啫。（報道話你拍攝中途唔舒服要請假？）冇啦！不嬲都會請假過年，我都差不多要返上去。（之後去長Trip造人？）未知，我會努力啦！」問有否請較同場的鍾嘉欣生仔心得？杏兒笑指對方傳授湊女心得較多。
對於有指舊愛黃宗澤以3千萬簽約邵氏3年，杏兒表示不知情，提到屆時雙方大有機會一齊拍電影，杏兒坦言合作絕冇問題，更謂：「希望佢簽邊度都好，都一切順利！（都有傳姚子羚好事近喎！）我未收到通告，祝佢哋雞年一切美滿同甜蜜啦！」