有啲嘢！高海寧孖鄧智偉一齊拜年
無綫藝員高海寧在將軍澳電視城為新劇《抱佣情人》開工，新年期間黃宗澤上載眾藝人到苗僑偉屋企拜年相，高海寧與緋聞男友鄧智偉被發現齊齊拜年，網民指莫非是兩人有意將戀情浮面，她笑說：「苗僑偉邀請我哋去，咁咪一齊去拜年囉，唔止我哋兩個，仲有好多人㗎。（有冇畀人催婚？）冇，點解要催婚呀。（網民話你哋情侶檔去拜年？）唔係，張相入面有好多人。（有冇帶鄧智偉見家長拜年？）未呀，冇呀。」
喪晒性感相
高海寧新年期間頻頻上載馬爾代夫性感相賀年，她笑說：「一月中生日同朋友即慶去咗馬爾代夫，條裙原本買嚟台慶着，但最後出席唔到，所以帶埋去馬爾代夫，嗰度好靚，所以影咗好多靚相。（仲有性感相發放？）唔係性感相，去到馬爾代夫基本上人人都着泳衣、裙仔，都唔係好性感啫，期實得兩日時間，來來去去都係呢批相，不過仲有好多靚相可以出。（預告仲有性感相？）要出仲有嘅，但唔會啦。（馬爾代夫係咪夢想結婚地方？）第一次去，因為自己唔識游水，本來對陽光海灘冇憧憬，去完發現個海原來可以咁靚，有機會想再去，去多幾個島玩。」