秘撻神秘富豪　廖碧兒升呢住千萬豪宅

現年38歲、華姐冠軍出身嘅廖碧兒（Bernice）入行多年，曾經與劉愷威同陳豪拍拖，但都係無疾而終。Bernice近年不時話係單身，但其實已經秘撻一名神秘富豪男友，男方對佢照顧有加，水頭充足嘅Bernice衣食住行全部升呢！

擲千萬法國買酒莊

變富貴嘅Bernice除咗搬離同父母一齊住嘅將軍澳寓所，獨自秘密搬入大埔倚龍山莊千萬豪宅！平日由父親做柴可夫嘅Bernice，仲請咗一名女司機管接管送，勁豪呀！Bernice有「大水喉」射住，決心向商界發展，早前仲喺法國買下近千萬港元嘅酒莊，又喺中環開酒吧，更豪擲逾百萬喺香港仔工廈開設中央廚房搞自家製食物加工場，可以話係財來自有方！

司機跟出跟入

Bernice同神秘富豪男友拍拖後密冚戀情，出入都警覺性十足。1月6日38歲生日的她，生日前一日鬼祟蜜會富貴男友。當日下午兩點左右，Bernice由女司機接載離開大埔豪宅，之後去尖沙咀、灣仔同友人歎茶食晚飯。為咗趕得切同男友甜蜜慶生，當晚10點左右就由司機接載喺灣仔直駛山頂，期間司機不斷喺附近兜圈，確保沒有人跟蹤，座駕隨即駛入僑福道嘅山頂豪宅，見Bernice急急腳落車步入豪宅，至凌晨仍未見佢走人。

扮靚濕平做闊太

平日唔使工作嘅日子，Bernice就過住闊太生活。為咗唔想男友呷醋，佢變咗異性絕緣體，連司機都係女仔，平日出去都只係搵女仔朋友見面。呢幾日，見佢約女仔朋友歎茶行名店，又去美容院扮靚靚，又做瑜伽keep住弗爆身材，認真豪呀！

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon